का माई के निशानी बन के रह जाई चंगेरी?

अस्मिना (48) अपना संगे काम करे वाली जुबैदा संघे हंसत आपन पुरान दिन याद करेली. उ लोग अपनी माई के फेंकल गेहूं के पुआल के बचल टुकड़ा से छोट-छोट टोकरी बनवले रहे. मेवात क्षेत्र के ज्यादातर लईकी लोग निहर इहो लोग अपने माई के कहला पर बुनाई सिखली. उनका एकदम अंदाजा ना रहे कि एक दिन इहे आजीविका के साधन बन जाई.

“हमनी के उ कुल बनाईं जा अपनी रिश्तेदारन के दे दिहीं जा. अब जब बिकन लगे तो हम ना देवें फ्री में (अब जब बिकाए लागल बा त हमनी के फ्री में ना देवेनी जा),” अस्मिना हंसत के कहेली.

हरियाणा के नूंह जिला के घासेड़ा गांव में अपनी घर के आंगन में सीमेंट के बेंच पर बईठल उ देसी गेहूं के पुआल से हाथ के बराबर डंटी (डंठल) लेली आ ओके एगो महीन सुई के मदद से पांच हिस्सा में बांट देली. ओमे से एगो पातर पट्टी चुन के उ बड़ा सफाई से चंगेरी (खोखला टोकरी) बीने लागत बाड़ी.

“घर में मेहमान लोग आवें आ रोटी चंगेरी में रख के ना दिहल जाओ त उ लोग शिकायत करी कि रोटी प्लेट में परोसल गईल बा, चंगेरी में ना,” अस्मिना कहेली.

चंगेरी तरह-तरह से काम आवेला. हरियाणा आ राजस्थान के मेवात इलाका के महिला लोग परम्परागत रूप से बीनेला. एगो समय रहे जब ई शादी, ईद आ अन्य उत्सवन पर उपहार देवे के रस्म के हिस्सा रहे.

चंगेरी बनावे के कला लईकी लोगन खातिर एगो जरूरी गुण रहे. लइकी खातिर लड़का ताके घरिया अक्सर एकर चर्चा होखे. अस्मिना बतावेली, “लईकी के साइड के लोग ई बतावे में गर्व करें कि उनकर बेटी एतना चित्रा (कुशल) हवे कि कवनो तरह के चंगेरी, गुदरी (कपड़ा के टुकड़न से बनल चादर) या चूल्हा (माटी के चूल्हा) बना सकेले.”

मेहरारू लोग दुपहरिया के समय एक दूसरा के घर के आंगन में एकट्ठा हो के बिनाई आ बातचीत कईल करें. “एगो मेहरारू अपनी चंगेरी पर काम करत के बीच में बईठे आ बाकि मेहरारू लोग आसपास बईठ के ओकरी काम पर लउकत डिजाईन के नकल कईल करें,” उ याद करेली.

उनकर छोट बेटी कुल ओइजे रहें आ खेल-खेल में ई कला सीख लेवें.

अब ई कुल बीतल बात हो गईल बा. मेहरारू लोग अब पहिले निहर केहू के घर में एकट्ठा ना होला आ लईकी लोग बिनाई नईखी कईल चाहत. ना अस्मिना, आ ना जुबैदा के बेटी लोग ई कला सिखले बा. उ कहेली सन कि हमनी के चंगेरी के जरूरत नईखे, रोटी रखे खातिर बर्तन बा. उ पूछेली सन, ‘अगर चंगेरिए बनावे के बा, त पढ़े-लिखे के का फायदा?’” अस्मिना कहेली. “उ हमनी से कहेली सन कि हमनी के जवान आ आजाद बानी जा,” अस्मिना बतावेली.

अस्मिना अब ई टोकरी 12 गो महिला लोगन के स्व-सहायता (आपसी मदद से चले वाला समूह) संघे बनावेली जेकर नाम बरकत हवे. हरियाणा राज्य ग्रामीण आजीविका मिशन के अंतर्गत आवे वाला ए समूह में उ अध्यक्ष के रूप में आपन सेवा दे रहल बाड़ी. नूंह जिला में 2,000 स्व-सहायता समूह बा.

राष्ट्रीय राजधानी क्षेत्र के हिस्सा होखे के बावजूद नूंह देश के सबसे पिछड़ा जिलन के सूची में सबसे ऊपर (नीति आयोग 2018) बा.

दूर के रिश्तेदार जुबैदा (52) आ अपनी भाभी के संघे अस्मिना बेगम 2014 से चंगेरी बेच रहल बाड़ी. मेहरारू लोग गुदरी आ पर्दा खातिर झालर भी बनावेला.

एगो चंगेरी कहीं भी 1000-1500 में बिकेला आ एके बनावे में दस से बारह दिन लागेला अगर रोज चार घंटा काम कईल जाओ. एकर आर्डर मिशन के माध्यम से मुख्य रूप से दिल्ली आ मुंबई से आवेला.

अस्मिना के आदमी अब्दुल एगो दुर्घटना के बाद काम कईल बंद कर देले रहलें एसे उ परिवार के एकमात्र कमाए वाली सदस्य हई जे हर महीना 7000 से 10000 रूपया ले कमा रहल बाड़ी.

टोकरी कवनो तरह के पुआल से ना बनावल जाए. “हमनी के एगो विशेष तरह के गेहूं उपयोग करेनी जा. नम्बर 306 या देसी गेहूं जवन कम पानी आ कम खाद से उगावल जाला,” अस्मिना कहेली. बढ़िया पुआल मिलल अब मुश्किल होखल जाता काहे कि ज्यादातर किसान लोग अब रसायनिक खाद आ कीटनाशक के उपयोग करेलें. एकरी वजह से पुआल कमजोर हो जाला आ उपयोग करे लायक ना रह पावे.

जेठ आ बैसाख (मार्च आ अप्रैल) में पुआल कीन के घर में जमा कईल जाला. जइसहीं मानसून आवेला, डंटी सब के चमकीला रंग में रंगल जाला आ हल्का घाम में सुखावे खातिर छोड़ दिहल जाला. एकरा ज्यादातर लाल, पीयर, हरियर आ गुलाबी रंग में रंगल जाला.

नम्बर 306 बहुत अच्छा गुणवत्ता वाला स्थानीय गेहूं बा. लगभग आधा एकड़ के खेत से मिले वाला एकर पुआल के दाम लगभग 15,000 रूपया होला आ एकरा से लगभग 1000 चंगेरी बनावल जा सकेला.

“बरखा में बनावल जाई त हाथ ना कटी,” अस्मिना कहेली. बरसात में पुआल नरम हो जाला एसे एके मोड़ल आ बीनल आसान हो जाला. बाकी समय एकर डंडी सूखल आ धारदार हो जाला.

पारी से मुलाकात के समय समूह के ऑस्ट्रेलिया से 200 चंगेरी बनावे के आर्डर मिलल रहे बाकिर एके पूरा करे खातिर ओ लोगन के लगे पुआल पूरा ना रहे. “जवन पुआल हमनी के चाहीं ओकर कमी हो गइल बा, काहें कि भारी बरखा से फसल तबाह हो गईल बा,” अस्मिना बतावेली.

चंगेरी के बुनाई में दू गो मुख्य प्रकार के टांका लागेला, चिरुवा आ आतन. चिरुवा में पुआल के कइएक पट्टी में बांटल जाला जेसे किनारा पर बारीक आ सघन बन्हाईल पैटर्न बनेला. आतन में पुआल के डंटी सब चपटा कईल जाला. एकरा से एगो चौड़ा आ उभरल बनावट बनेला, जेकरा से अक्सर पेंदा (निचला हिस्सा) बनावल जाला.

“बहोत नन्हो काम है (बड़ा बारीक काम बा),” जुबैदा कहेली.

डिजाईन में रोजमर्रा के चीजन के उपयोग होला. स्थानीय फूल पौधा से ले के सोना के चोकर (हार) भी होला जवन मेवाती महिला लोगन के पहिनल बहुत पसंद होला. टोकरी के किनारे पर खजूर के पेड़, लहर आ पान के पत्ता के पैटर्न होखेला. विशेष अवसरन पर मालिक लोगन के नाम भी बीनल जा सकेला.

अस्मिना एक बेर लिखावट वाली टोकरी बनवले रहली जेकरी किनारा पर लिखल रहे, “एक रोटी खाए, दूसरी पे हाथ ना लगाये, और धाप के खाए (खाली एगो रोटी खाईं आ दूसरी के मत छुईं तब्बो पेट भर जाए)” जवन एने चले वाला एगो आम कहावत हवे.

“हमनी के हर तरह के कलाकारी करेनी जा,” उ हंस के कहेली.

“हर कोइल (घुमाव) पर हमनी के गिनेनी जा कि कवनी रंग के केतना टांका लागल बा. जईसे मान लीं हरियर फूल के एगो कोइल में पांच गो टांका बा आ अगिला में चार. त हमनी के एके याद रखे के पड़ेला नाहीं त पैटर्न ख़राब हो जाई,” अस्मिना बतावेली.

जुबैदा एगो टोकरी लेले बाड़ी, ई सात अलग-अलग फूलन के पैटर्न से बनल बा आ एके उ अपनी बेटी के बियाह खातिर रखले बाड़ी.

बाकिर बारीक आ जटिल डिजाईन वाला चंगेरी बनल अब कम होत जा रहल बा. “अब लोग सिखते नइखे, त चंगेरी के खतम होखहीं के पड़ी,” उ अफ़सोस जतावत के कहेली.

राजस्थान के अलवर जिला के टपूकरा में बड़ होत के अस्मिना चंगेरी बनावल ना चाहें. उ अपनी माई मरियम से कहें कि उ उनकरे बनावल टोकरी ले के अपनी ससुराल चल जइहें. बाकिर एक बेर बियाह भईला के बाद उनके बुझाईल कि ई एगो परम्परा हवे जेसे उ बच ना सकत रहली. उनकर सास कपूरी भी ओही जूनून के संघे एह कला में लागल रहली.

“जब हम एइजा (नूंह) अईनी त घर आ मोहल्ला में सब केहू चंगेरी बनावे. तब हमहूं ई काम शुरू कर देनी,” अस्मिना पुरान समय याद करत के कहेली.

चंगेरी बनावे के काम पहिले हिन्दू आ मुस्लिम दूनो समुदाय के मेहरारू लोग करत रहे. हालांकि बाद में समय के संघे एकरा मुख्य रूप से मुस्लिम मेहरारू लोग आगे बढ़वलक. “हिन्दू मेहरारुवन में कुछ बुजुर्ग मेहरारू लोग ही अभी ले ई शिल्प बचा के रखले होईहें,” अस्मिना कहेली. “हिन्दू परिवार पढ़-लिख गईलें सन आ एसे दूरी बना लिहलें.

नूंह जिला में जादेतर मेव मुसलमान लोग रहेला. उ लोग ऐतिहासिक रूप से हिन्दू संस्कृति के रीती-रिवाजन के इस्लामी आस्था संघे मिला के चलेला.

अस्मिना के सात गो बच्चा बाड़ें, तीन गो बेटी आ चार गो बेटा. उनकर बड़ बेटी के बियाह दस साल पहिले 18 बरिस के उमिर में हो गईल रहे. “बाकिर अब हमके शिक्षा के महत्व समझ में आवेला,” उ कहेली. उनकर दुसरकी बेटी स्नातक बाड़ी जबकि सबसे छोटकी कक्षा 11 में पढ़ेले आ फुटबॉल खेलेले.

“ए समय उ एगो टूर्नामेंट खातिर रोहतक गईल बा,” अस्मिना गर्व के संघे मुस्करा रहल बाड़ी. उनकी बेटी के सपना पुलिस अधिकारी या त फुटबॉल कोच बनला के हवे. “अब एइजा के लोगन के सोचे के ढंग बदल रहल बा. अब उ लोग चाहेला कि उनकर बच्चा पढ़ाई पर ध्यान देवें,” उ आगे बतावेली.

पड़ोसी आ रिश्तेदार लोग के मीन मेख अनदेखी करत जब अस्मीना काम शुरू कइली, त ऊ एह सोच के बदले में बड़ भूमिका निभवली. बाद में उ अधिकारियन के याचिका दिहली कि गांव के एकमात्र कन्या विद्यालय कक्षा 12 तक बढ़ा दिहल जाओ. आज ओइजा करीब 100 गो लईकी लोग पढ़ रहल बाड़ी सन.

“एइजा के बच्चा कुल बिना मतलब इहां उहां घूमत रहें सन. जुबैदा, हम आ कुछ और मेहरारू लोग घर-घर जा के परिवारन के सरकारी स्कूल में बच्चन के नाम लिखावे खातिर समझाईं जा. ओ साल करीब 70 गो बच्चा स्कूल जाए शुरू कईलें सन आ ओमे से कईयन गो के लगे नौकरी बा,” उ याद करत कहेली.

अस्मिना अपने कबो स्कूल ना गईली. बाकिर जब स्व-सहायता समूह के माध्यम से मिले जुले वाला अधिकारी लोग बूझ लेला कि उ शिक्षित हई त उनकर मन प्रसन्न हो जाला. उनके जवन सम्मान आ सराहना मिलल बा, ओमे ‘बरकत’ समूह के अलग-अलग प्रदर्शनी आ मेलन में प्रधानमंत्री आ मुख्यमंत्री से मिलल शामिल बा. उनका खातिर ई गर्व के बात हवे.

“हमरी दरवाजा पर लाल बत्ती वाला गाड़ी रुकेली सन, त पूरा गांव के गर्व महसूस होला,” उ कहेली. “गांव के पढ़ल-लिखल लोग भी अब हमनी के काम के हिस्सा बनल चाहेला. पहिले लोग इहे कहे कि मेहरारू लोगन के बाहर निकलल गुनाह (पाप) हवे.”

अस्मीना आपन माई से चंगेरी बनावे के सिखले ना रहती, त ई सब संभव ना हो पाइत. लेकिन आज ऊ आ जुबैदा दूनो जानी ए बात के लेकर शंका में बाड़ी कि ई कला कब ले बच पाई. “छोट लईकी कुल खाली माई के निशानी के रूप में चंगेरी राखल चाहत बाड़ी सन,” उ लोग एक साथे कहेली, “आ एक दिन इहे कुल होई.”

स्टोरी मृणालिनी मुखर्जी फाउंडेशन (एमएमएफ) द्वारा फेलोशिप प्राप्त हवे.